বিৰোধীৰ বাবে 'চশমাজ্যোতি আঁচনি'! কোন বিধায়কে দাবী কৰিলে 'চশমাজ্যোতি আঁচনি'ৰ?

বিৰোধীৰ বাবে 'চশমাজ্যোতি আঁচনি'!
কোনে বিধায়কে দাবী কৰিলে 'চশমাজ্যোতি আঁচনি'ৰ ? 

চৰকাৰে ভাল কাম কৰিলেও দেখা নাপায় বিৰোধীয়ে। চৰকাৰৰ প্ৰতিটো কাম বিৰোধীয়ে সদায় বেয়াই দেখে। বিৰোধীৰ বাবে 'চশমাজ্যোতি আঁচনি'ৰ দাবী মৰিগাঁৱৰ বিধায়ক ৰমাকান্ত দেউৰীৰ। 

চলি আছে অসম বিধানসভাৰ শীতকালীন অধিৱেশন। শীতকালীন অধিৱেশনৰ পঞ্চম তথা অন্তিম দিনটোত আজি পুনৰ এক অদ্ভুত যুক্তি এগৰাকী বিজেপি বিধায়কৰ। মৰিগাঁৱৰ বিধায়ক ৰমাকান্ত দেউৰীৰ দাবী- চৰকাৰে ভাল কৰিলেও বিৰোধীয়ে বেয়াই দেখে।  গতিকে বিৰোধীৰ দৃষ্টিশক্তি প্ৰবল কৰাৰ বাবে বিৰোধীক চশমা দিবলৈ আহ্বান বিধায়ক গৰাকীৰ। যাৰ বাবে বিধায়ক ৰমাকান্ত দেউৰীয়ে মুখ্য়মন্ত্ৰীক বিনামূলীয়া 'চশমাজ্যোতি আঁচনি' নামৰ এখন নতুন আঁচনি আনিবলৈ আহ্বান জনায়। 

ৰমাকান্ত দেউৰীয়ে ক'লে- বিৰোধীয়ে ৬ জনগোষ্ঠীৰ জনজাতিকৰণ হোৱাটো কেতিয়াও নিবিচাৰে। পূৰ্বৰ জনজাতি লোক সকলৰ হানি নোহোৱাকৈ ৬ জনগোষ্ঠীক জনজাতিকৰণ কৰিলে সকলোৰে ভাল হ'ব। ৬ জনগোষ্ঠীক জনজাতিকৰণ দিলে খিলঞ্জীয়া সুৰক্ষিত হ'ব আৰু তেতিয়াহে অসমখনক জনজাতীয় ৰাজ্য’হিচাপে ঘোষণা কৰিব পৰা যাব।

অসমৰ বিৰোধী বিধায়ক সমূহৰ হাতত এখন ম্যাদী আঁচনি আছে। সেয়া হ'ল সকলো কামতে চৰকাৰৰ বিৰুদ্ধাচৰণ কৰা। বিৰোধীয়ে কেতিয়াও চৰকাৰৰ ভাল কামবিলাক দেখা নাপায়। সেয়ে মই মুখ্যমন্ত্ৰীক বিৰোধীৰ বাবে  'চশমাজ্যোতি আঁচনি' নামেৰে এখন নতুন আঁচনি আনিব দিছো। 

উল্লেখ্য যে ৰমাকান্ত দেউৰীৰ পূৰ্বে কালি বিধানসভাৰ মজিয়াত মন্ত্ৰী বিমল বৰায়ো এক অদ্ভুত যুক্তি দাঙি ধৰিছিল। সদনৰ প্ৰশ্নোত্তৰ ঘণ্টাৰ সময়ত কিছু বিতৰ্ক সৃষ্টি হোৱাৰ সময়তে নিলম্বিত হৈছিল শিৱসাগৰ সমষ্টিৰ বিধায়ক অখিল গগৈ। ইয়াৰ পাছতে মন্ত্ৰী বিমল বৰাৰ মুখত শুনিবলৈ পোৱা গৈছিল এই অদ্ভুত যুক্তিটো। বিমল বৰাৰ মতে অসম বিধানসভাৰ ভিতৰত লাগে “ডিটেনচন ৰুম”! সদন চলি থকাৰ সময়ত নিলম্বিত বিধায়কক ৰাখিবলৈ অধ্যক্ষ বিশ্বজিৎ দৈমাৰীক “ডিটেনচন ৰুম”ৰ ব্যৱস্থা কৰিবলৈ আহ্বান জনালে কেবিনেট মন্ত্ৰী বিমল বড়াই। 

কিয় বিধানসভাৰ ভিতৰত  “ডিটেনচন ৰুম” লাগে তাৰো বাখ্যা দিলে বিমল বৰাই। মন্ত্ৰী গৰাকীৰ মতে, নিলম্বিত হোৱাৰ পাছত বিধায়ক সকলে প্ৰায়ে ওলাই যায় আৰু বাহিৰত গৈ সংবাদ মাধ্যমৰ আগত ভুল বাখ্যা কিছুমান আগবঢ়ায়। মন্ত্ৰী বড়াই অধ্যক্ষক কয়, “নিলম্বিত বিধায়ক সকলৰ বাবে বিধানসভাত এটা কোঠাৰ ব্যৱস্থা কৰিব লাগে, যাতে নিলম্বিত বিধায়ক সকলক সেই কোঠাত ৰাখিব পাৰে। নিলম্বন কৰাৰ পাছত চৌহদৰ পৰা ওলাই যাবলৈ দিয়া উচিত নহয়,কাৰণ তেওঁলোকে ওলাই গৈ সংবাদ মাধ্যমৰ জৰিয়তে ভুল বাখ্যা এৰি দিয়ে।” তেওঁ আৰু কয়,”হয়তো সকলো সুবিধা থকা ডিটেনচন ৰুম এটা থাকিব পাৰে।”