মুস্তাক আলী ট্ৰফীত চৰ্চাত অসমৰ মুখতাৰ হুছেইন

মুস্তাক আলী ট্ৰফীত চৰ্চাত অসমৰ মুখতাৰ হুছেইন

ছৈয়দ মুস্তাক আলী ট্ৰফীত প্ৰথমটো জয় অসমৰ। পেচ তাৰকা মুখতাৰ হুছেইনৰ বিধ্বংসী বলিঙত দিশহাৰা ছত্তীশগড়। মুখতাৰ হুছেইনৰ বলিং বিক্ৰমত অসমৰ হাতত  ৪৮ ৰানত পৰাস্ত ছত্তীশগড়।

চলি আছে ভাৰতৰ ঘৰুৱা টি-২০ প্ৰতিযোগিতা ছৈয়দ মুস্তাক আলী ট্ৰফী। মুস্তাক আলী ট্ৰফীৰ গ্ৰুপ পৰ্যায়ৰ এখন খেলত কালি সমুখসমৰত নামিছিল অসম আৰু ছত্তীশগড়। টছত জয়ী হৈ প্ৰথমে বলিং কৰাৰ সিদ্ধান্ত লৈছিল ছত্তীশগড়ে।

প্ৰথমে বেটিং কৰিবলৈ অহা অসমক সুন্দৰ আৰম্ভণি দিয়ে অপেনাৰদ্বয় সুমিত গাডিগাওকাৰ আৰু প্ৰদ্যুন শইকীয়াই। প্ৰথম উইকেটৰ দুয়োজনে ৯৫ ৰান সংগ্ৰহ কৰে। ব্যক্তিগত ৩৭ ৰানত প্ৰদ্যুন শইকীয়া পেভিলিয়মনুখী হয় যদিও সুমিত গাডিগাওকাৰে বিস্ফোৰক ৭৯ ৰানৰ ইনিংছ খেলে।  ব্যৰ্থ হয় ৰিয়ান পৰাগ (১৫)। আনহাতে মিডল অৰ্ডাৰ বেটাৰ নিহাৰ ডেকাই সংগ্ৰহ কৰা অপৰাজিত ২২ ৰানৰ সহায়ত অসমে নিৰ্ধাৰিত ২০ অভাৰত ৯টা উইকেট হেৰুৱাই সংগ্ৰহ কৰে ১৬৭ ৰান। ছত্তীশগড়ৰ হৈ ৰবি কিৰণ, সৌৰভ মজুমদাৰ আৰু গগণদ্বীপ সিঙে দখল কৰে ২ টাকৈ উইকেট দখল কৰে। 
  
প্ৰত্যুত্তৰত ১৬৭ ৰানৰ বিজয়লক্ষ্যৰে বেটিং কৰিবলৈ আহি পেচ তাৰকা মুখতাৰ হুছেইনৰ বিধ্বংসী বলিঙত দিশহাৰা হৈ ছত্তীশগড়ে ১১৯ ৰানতে ইনিংছ সামৰে। মুখতাৰ হুছেইনে ৪ অভাৰত ২০ ৰানৰ বিনিময়ত দখল কৰে ৬টা উইকেট। 

এই প্ৰতিযোগিতাৰ এখন মেচত কালি ছত্তীশগড়ৰ বিৰুদ্ধে অৱতীৰ্ণ হৈছিল অসম। মেচখখনত চমকপ্ৰদ প্ৰদৰ্শনেৰে অসমে ছত্তীশগড়ক ৪৮ ৰানত পৰাস্ত কৰে। প্ৰথম মেচত অন্ধ্ৰ প্ৰদেশৰ বিপক্ষে পৰাজয়ৰ পিছত কালি প্ৰতিযোগিতাত নিজৰ প্ৰথম জয়ৰ সোৱাদ পাইছে অসম ক্ৰিকেট দলে। অসমৰ এই জয়ৰ প্ৰধান নায়ক হিচাপে পৰিগণিত হয় দলৰ বলিং আক্ৰমণৰ প্ৰধান হোতা পেচাৰ মুখতাৰ হুছেইন। ছত্তীশগড়ৰ হৈ সৰ্বাধিক ৪৬ ৰান সংগ্ৰহ কৰে অধিনায়ক অমনদ্বীপ খাৰে। আনহাতে শশাংক চন্দ্ৰকাৰে ৩০ ৰানৰ ইনিংছ খেলে। 

উল্লেখ্য যে অন্ধ্ৰপ্ৰদেশৰ বিৰুদ্ধে প্ৰথম মেচখনতো মুখতাৰ হুছেইনে ৪ অভাৰত ২০ ৰান খৰচ কৰি ৪টা উইকেট দখল কৰিছিল। অৱশ্যে মুখতাৰ হুছেইনৰ এনে প্ৰদৰ্শনৰ পিছতো  অন্ধ্ৰপ্ৰদেশৰ বিৰুদ্ধে মেচখনত বেটিং ব্যৰ্থতাৰ বাবে পৰাস্ত হৈছিল অসম। কিন্তু মুস্তাক আলী ট্ৰফীৰ প্ৰথম দুখন মেচতে এইপৰ্যন্ত ১০ উইকেট দখল কৰি এতিয়া চৰ্চাত অসমৰ মুখতাৰ হুছেইন।