নলবাৰীৰ চাঞ্চল্যকৰ হত্যাকাণ্ডৰ শেষৰজন অভিযুক্ত আৰক্ষীৰ জালত

নলবাৰীৰ চাঞ্চল্যকৰ হত্যাকাণ্ডৰ শেষৰজন অভিযুক্ত আৰক্ষীৰ জালত

২৯ আগষ্টৰ নিশা নলবাৰীৰ মোহখলী গাওঁত সংঘটিত হৈছিল চাঞ্চল্যকৰ ডকাইতি আৰু হত্যাকাণ্ড। ঘৰৰ ভিতৰতে এজন ব্যক্তিক নিৰ্দয়ভাৱে হত্যা কৰিছিল এটা ডকাইতৰ দলে। ভয়াবহ ঘটনাটো সংঘটিত কৰিছিল ৰূপম বেজবৰুৱা, মৃন্ময় বেজবৰুৱা, ভাস্কৰজ্যোতি ডেকা আৰু কল্পজ্যোতি ডেকা নামৰ ৪ ডকাইতে । ৰাজ্য কঁপাই যোৱা এই হত্যাকাণ্ডৰ অন্যতম অভিযুক্ত কল্পজ্যোতি ডেকা অৱশেষত আৰক্ষীৰ জালত।

উল্লেখ্য যে আৰক্ষীয়ে হত্যাকাণ্ডৰ অন্যতম অভিযুক্ত ভাস্কৰজ্যোতি ডেকাক গ্ৰেপ্তাৰ কৰাৰ পিছতে পোহৰলৈ আহিছিল ভয়ংকৰ হত্যাকাণ্ডৰ সমস্ত ঘটনা । ভাস্কৰজ্যোতি ডেকাৰ স্বীকাৰোক্তিৰ পিছতে  আৰক্ষীয়ে জোৰদাৰ অভিযান চলাই ডকাইতৰ দলটোৰ মৃন্ময় বেজবৰুৱাক গ্ৰেপ্তাৰ কৰাৰ লগতে মৃন্ময় বেজবৰুৱাৰ প্ৰেয়সীক গুৱাহাটীৰ পৰা গ্ৰেপ্তাৰ কৰিছিল। আৰক্ষীয়ে সমগ্ৰ ঘটনাৰ তদন্তৰ অন্তত ভয়ংকৰ হত্যাকাণ্ডৰ মুল মাষ্টাৰ মাইণ্ড কল্পজ্যোতি ডেকা বুলি উল্লেখ কৰিছিল ।

অভিযুক্তই দিয়া স্বাকাৰোক্তি অনুসৰি সমগ্ৰ ঘটনাটোৰ পৰিকল্পনা কৰিছিল ১৫ দিন পূৰ্বে । ২৯ আগষ্টৰ নিশা সংঘটিত ভয়াবহ ঘটনাটোৰ ১৫ দিন পূৰ্বে ডকাইতিৰ পৰিকল্পনা কৰিছিল কল্পজ্যোতি ডেকাই । 
এই ভয়াবহ ঘটনা সংঘটিত কৰাৰ পিছতে অভিযুক্ত ৰুপম বেজবৰুৱা আৰু কল্পজ্যোতি ডেকাই অসম এৰি আশ্ৰয় লৈছিল মুম্বাইত । 

ঘটনাৰ পিছতে কেবাদিন ধৰি মুম্বাইত আশ্ৰয় লৈ আছিল দুই বন্ধু ৰুপম বেজবৰুৱা আৰু কল্পজ্যোতি ডেকাই । যোৱা ৭ চেপ্তেম্বৰত মুম্বাইত কল্পজ্যোতি ডেকা আৰু ৰুপম বেজবৰুৱাৰ পৃথক হৈছিল । তাৰ পিছতে অনুসূচনাত দগ্ধ হৈ ১১ চেপ্তেম্বৰত ৰুপম বেজবৰুৱাই আত্মসমৰ্পণ কৰিছিল নলবাৰী সদৰ থানাত । চাৰি অভিযুক্তই সংঘটিত কৰা ভয়াবহ ঘটনাটোৰ বিষয়ে কেমেৰাৰ সম্মুখতে এটা এটাকৈ চাঞ্চল্যকৰ স্বীকাৰোক্তি দিছিল ৰুপম বেজবৰুৱাই । আৰু অৱশেষত সুদীৰ্ঘ তিনিমাহ পলাই থকাৰ পিছত শুকুৰবাৰে নিশা বেলশৰ  আৰক্ষীয়ে গ্ৰেপ্তাৰ কৰে ঘটনাটোৰ মাষ্টাৰ মাইণ্ড কল্পজ্যোতি ডেকাক ।

অভিযুক্তই দিয়া স্বীকাৰোক্তি অনুসৰি উক্ত দিনা চাৰিজনীয়া ডকাইতৰ দলটোৱে নিহত প্ৰমোদ বৰ্মনৰ মোহখলিৰ ঘৰত সোমাইছিল পিছফালেৰে । প্ৰথমতে ৰান্ধনি ঘৰত প্ৰবেশ কৰি পত্নী মীৰা তালুকদাৰক ৰচীৰে বান্ধিছিল । পিছত প্ৰমোদ বৰ্মনক মুখত সংজ্ঞাহীন গেছ দি ধন সোন লুটপাত কৰিছিল । পৰৱৰ্তী সময়ত প্ৰমোদ বৰ্মনে সংজ্ঞা ঘুৰাই পাই ডকাইতৰ দলটোৰ সদস্যক চিনি পোৱা বুলি গম পাই ডকাইতৰ দলটোৱে প্ৰমোদ বৰ্মনক অতি নিৰ্দয়ভাৱে ঠেকেচি ঠেকেচি হত্যা কৰিছিল । 

আৰক্ষীৰ গ্ৰেপ্তাৰৰ ভয়ত পলাই ফুৰিছিল ৰূপম বেজবৰুৱা আৰু কল্পজ্যোতি ডেকাই । পৰৱৰ্তী সময়ত অনুসূচনাত দগ্ধ হৈ ৭ চেপ্তেম্বৰত মুম্বাই এৰিছিল ৰূপম বেজবৰুৱাই। মুম্বাইৰ পৰা আহি ১১ চেপ্তেম্বৰত ৰূপম বেজবৰুৱাই নলবাৰী সদৰ থানাত কৰিছিল আত্মসমৰ্পন । আৰু অৱশেষত ডকাইতি, হত্যাকাণ্ডৰ মাষ্টাৰ মাইণ্ড কল্পজ্যোতি ডেকাকো গ্ৰেপ্তাৰ কৰিবলৈ সক্ষম হয় আৰক্ষীয়ে।