বিদায় দিলে ক্ৰিকেটক! ১৭ বছৰীয়া কেৰিয়াৰ অন্ত পেলাই অৱসৰ ঘোষণা তাৰকা ক্ৰিকেটাৰৰ

ভাৰতীয় ক্ৰিকেট দলৰ হৈ খেলা জম্মু-কাশ্মীৰৰ প্ৰথমগৰাকী ক্ৰিকেটাৰ পাৰভেজ ৰাছুলৰ অৱসৰ ঘোষণা। ১৭ বছৰীয়া কেৰিয়াৰ অন্ত পেলাই অৱসৰ ঘোষণা কৰে তাৰকা ক্ৰিকেটাৰ পাৰভেজ ৰাছুলে।

২০১৪ চনত বাংলাদেশৰ বিৰুদ্ধে (ODI) এদিনীয়া খেলত ভাৰতৰ হৈ অভিষেক ঘটিছিল ৰাছুলৰ। তেতিয়াৰ বাংলাদেশৰ কেপ্টেইন মুছফিকুৰ ৰহিম আৰু অনামুল হকৰ উইকেট দখল কৰিছিল ৰাছুলে। ২০১৭ চনত ইংলেণ্ডৰ বিৰুদ্ধে টি-২০ত ভাৰতৰ হৈ খেলিছিল পাৰভেজ ৰাছুলে।

ৰাছুলে ক্ৰিকেটৰ কেৰিয়াৰত ৫৬৪৮ ৰান সংগ্ৰহ কৰি প্ৰথম শ্ৰেণীৰ ক্ৰিকেটত ৩৫২টা উইকেট দখল কৰে। ৰঞ্জি ট্ৰফীৰ শ্ৰেষ্ঠ অলৰাউণ্ডাৰ হিচাপে দুবাৰকৈ লালা অমৰনাথ বঁটা লাভ কৰে। ২০১৩-১৪ আৰু ২০১৭-১৮ ছিজনৰ বাবে ৰাছুলে লাভ কৰিছিল এই বঁটা।

ইণ্ডিয়ান প্ৰিমিয়াৰ লীগ (IPL) খেলা জম্মু-কাশ্মীৰৰ প্ৰথমগৰাকী খেলুৱৈও আছিল ৰাছুল। IPLত ২০১৩ চনত পুনে ৱাৰিয়ৰ্ছ ইণ্ডিয়াৰ হৈ অভিষেক ঘটিছিল ৰাছুলৰ। ৰয়েল চেলেঞ্জাৰ বেংগালুৰু আৰু ছানৰাইজাৰ্ছ হায়দৰাবাদৰ হৈও খেলিছিল ৰাছুলে। ২০১৩ চনৰ পৰা ২০১৬ চনৰ ভিতৰত IPLৰ ১১খন মেচ খেলি ৪টা উইকেট দখল কৰিছিল পাৰভেজ ৰাছুলে।

সামাজিক মাধ্যমত ক্ৰিকেটক বিদায় জনাই ৰাছুলে লিখে- 'আলহামদুলিল্লাহ। আজিৰ দিনটোত, মই মোৰ প্ৰফেছনেল ক্রিকেটৰ পৰা অৱসৰ ঘোষণা কৰিছোঁ। এয়া এক অবিশ্বাস্য যাত্ৰা আছিল, যি সপোন, কঠোৰ পৰিশ্ৰম, আনন্দ, আৰু বহু স্মৃতিয়ে ভৰা। স্থানীয় খেলপথাৰৰ পৰা দেশক প্ৰতিনিধিত্ব কৰালৈ, ক্রিকেটত আল্লাহে মোক সকলোবোৰ দিছে, যি মই কেতিয়াও আশা কৰা নাছিলোঁ। মোৰ পৰিয়াল, প্ৰশিক্ষক, সহ-দলীয়া আৰু শুভাকাংশীৰ মৰম, বিশ্বাস আৰু মোৰ এই যাত্ৰাত অবিৰত সমৰ্থনৰ বাবে কৃতজ্ঞতা জ্ঞাপন কৰিছোঁ। খেলপথাৰত যিবোৰ মুহূৰ্ত কাটাইছিলো, সেইবোৰক লৈ মই গৌৰৱবোধ কৰিছো। মোৰ অন্তৰংগ প্ৰণাম জম্মু আৰু কাশ্মীৰ খেল পৰিষদ আৰু জম্মু আৰু কাশ্মীৰ চৰকাৰক। যদিও মই প্ৰফেছনেল ক্রিকেটৰ পৰা বিদায় লৈছো, তথাপিও মই ক্ৰিকেটৰ সৈতে সংলগ্ন হৈ থাকিম'।