হৰমুজ প্ৰণালী আৱদ্ধ ডজন ডজন ভাৰতীয় পতাকাযুক্ত জাহাজ

হৰমুজ প্ৰণালী আৱদ্ধ ডজন ডজন ভাৰতীয় পতাকাযুক্ত জাহাজ 

পশ্চিম এছিয়াত বৃদ্ধি পাইছে উত্তেজনা। হৰমুজ প্ৰণালীৰ ওচৰত ডজন ডজন ভাৰতীয় পতাকাযুক্ত জাহাজ আৱদ্ধ হৈ আছে।  যাৰ ফলত নাবিকৰ নিৰাপত্তা আৰু বিশ্ব বাণিজ্য পথক লৈ যথেষ্ট উদ্বেগ বৃদ্ধি পাইছে। হৰমুজ প্ৰণালীৰ ওচৰত আৱদ্ধ হৈ আছে ডজন ডজন ভাৰতীয় জাহাজ। পশ্চিম এছিয়াত উত্তেজনা বৃদ্ধি পোৱাৰ লগে লগে ১,১০০ ৰো অধিক নাবিক কঢ়িয়াই নিয়া কমেও ৩৭ খন ভাৰতীয় পতাকাযুক্ত জাহাজ বৰ্তমান কৌশলগত হৰমুজ প্ৰণালীৰ ওচৰত আৱদ্ধ হৈ আছে। জাহাজসমূহ পাৰ্চী উপসাগৰ আৰু ওমান উপসাগৰত অৱস্থিত।  কিছুমান জাহাজে সামগ্ৰী বোজাই কৰিবলৈ অপেক্ষা কৰি আছে । আনহাতে আন কিছুমান ইতিমধ্যে সম্পূৰ্ণৰূপে বোজাই হৈ নিৰাপদ চলাচলৰ বাবে অপেক্ষা কৰি আছে। বিশ্বব্যাপী তেল আৰু সামগ্ৰী পৰিবহণত এই অঞ্চলৰ গুৰুত্বপূৰ্ণ ভূমিকাৰ প্ৰতি লক্ষ্য ৰাখি পৰিস্থিতিয়ে সামুদ্ৰিক কৰ্তৃপক্ষ আৰু বাণিজ্য অংশীদাৰসকলৰ মাজত উদ্বেগৰ সৃষ্টি কৰিছে, যাৰ ফলত অনিশ্চয়তাৰ সন্মুখীন হৈছে নাবিক সকল। তথ্য অনুসৰি, বৰ্তমান ১,১০৯ জন ভাৰতীয় নাবিক এই জাহাজসমূহত আছে। জাহাজসমূহে শক্তি, বাণিজ্য আৰু অত্যাৱশ্যকীয় সামগ্ৰীৰ সৈতে জড়িত সামগ্ৰী পৰিবহণত নিয়োজিত হৈ আছে, যাৰ ফলত সামুদ্ৰিক নিৰাপত্তা আৰু যোগান শৃংখল উভয়ৰে বাবে পৰিস্থিতি গুৰুত্বপূৰ্ণ হৈ পৰিছে। ইৰাণ আৰু আমেৰিকা যুক্তৰাষ্ট্ৰ আৰু ইজৰাইল জড়িত মিত্ৰজোঁটৰ মাজত বৃদ্ধি পোৱা উত্তেজনাই অঞ্চলটোত অনিশ্চয়তাৰ সৃষ্টি কৰিছে। হৰমুজ প্ৰণালী বিশ্বৰ অন্যতম গুৰুত্বপূৰ্ণ জাহাজ চলাচলৰ পথ, আৰু যিকোনো ধৰণৰ বাধাই বিশ্ব বাণিজ্য আৰু তেল যোগানত প্ৰভাৱ পেলাব পাৰে। জাহাজ মালিক সন্থাৰ চৰকাৰী হস্তক্ষেপৰ আহ্বান। ইণ্ডিয়ান নেচনেল শ্বিপঅ’নাৰ্ছ এছ’চিয়েশ্যন (INSA) এ অঞ্চলটোত ভাৰতীয় জাহাজৰ উপস্থিতি নিশ্চিত কৰিছে আৰু ভাৰত চৰকাৰক সহায়ৰ বাবে আহ্বান জনাইছে। তথ্য অনুসৰি কেইবাখনো জাহাজ হৰমুজ প্ৰণালীৰ দুয়োফালে চলাচল কৰি আছিল। কিছুমান জাহাজে সামগ্ৰীৰ নিৰ্দেশনাৰ বাবে অপেক্ষা কৰি আছে, আন কিছুমানে ইতিমধ্যে সামগ্ৰী কঢ়িয়াই আছে। সন্থাই চৰকাৰক প্ৰণালীটোৰ মাজেৰে ভাৰতীয় জাহাজসমূহৰ নিৰাপদ চলাচল নিশ্চিত কৰাত সহায় কৰিবলৈ অনুৰোধ জনাইছে। বিশ্বৰ তেল আৰু গেছৰ এক বৃহৎ অংশ এই সংকীৰ্ণ জলপথৰ মাজেৰে পাৰ হয়, যিয়ে পাৰ্চী উপসাগৰক আৰব সাগৰৰ সৈতে সংযোগ কৰে। অঞ্চলটোত যিকোনো ধৰণৰ বাধাই বিশ্বব্যাপী শক্তি বজাৰ আৰু জাহাজ চলাচলৰ পথত যথেষ্ট প্ৰভাৱ পেলাব পাৰে। দেশৰ পশ্চিম এছিয়াৰ পৰা অহা খাৰুৱা তেল আমদানিৰ এক বৃহৎ অংশ এই প্ৰণালীৰ মাজেৰে পাৰ হয়। ভাৰতৰ বাবে এই জলপথ অতিকৈ গুৰুত্বপূৰ্ণ।