ভাৰতৰ সৈতে কি কি চুক্তি কৰিব পুটিনে? ৰাষ্ট্ৰপতি ভৱনত ভ্লাডিমিৰ পুটিনক উষ্ম আদৰণি

নতুন দিল্লীৰ ৰাষ্ট্ৰপতি ভৱনত ৰুছ ৰাষ্ট্ৰপতি ভ্লাডিমিৰ পুটিনক উষ্ম আদৰণি। ৰাষ্ট্ৰপতি দ্ৰৌপদী মুৰ্মুৱে আনুষ্ঠানিকভাৱে আদৰিলে ৰুছ ৰাষ্ট্ৰপতিগৰাকীক।

প্ৰধানমন্ত্ৰী নৰেন্দ্ৰ মোদীৰ লগতে বহুকেইজন কেবিনেট সতীৰ্থ উপস্থিত আদৰণি অনুষ্ঠানত। ৰাষ্ট্ৰপতিৰ গাৰ্ডৰ দ্বাৰা আগবঢ়োৱা গাৰ্ড অব্ অনাৰো গ্ৰহণ কৰিলে ৰাষ্ট্ৰপতি পুটিনে।

ৰাইজিনা হিল্ছৰ পৰা ৰাষ্ট্ৰপতি পুটিন পোনে পোনে গ’ল ৰাজঘাটলৈ। ৰাজঘাটত জাতিৰ পিতা মহাত্মা গান্ধীক শ্ৰদ্ধাঞ্জলি জনায় ৰুছ ৰাষ্ট্ৰপতিজনে।

দৰ্শনাৰ্থীৰ টোকাবহীত মহাত্মা গান্ধীলৈ শ্ৰদ্ধাঞ্জলি জ্ঞাপন কৰি স্বাক্ষৰ কৰে পুটিনে। ৰাজঘাটৰ পৰা ৰাষ্ট্ৰপতি পুটিন ৰাওনা হয় হায়দৰাবাদ হাউছলৈ।

হায়দৰাবাদ হাউছতে অনুষ্ঠিত হ’ব ২৩ সংখ্যক ভাৰত-ৰুছ দ্বিপাক্ষিক শীৰ্ষ সন্মিলন। প্ৰধানমন্ত্ৰী নৰেন্দ্ৰ মোদী, ৰুছ ৰাষ্ট্ৰপতি ভ্লাডিমিৰ পুটিনৰ মাজত হ’ব দ্বিপাক্ষিক বৈঠক।

কেইবাটাও গুৰুত্বপূৰ্ণ দ্বিপাক্ষিক বিষয়ত আলোচনা হ’ব শীৰ্ষ সন্মিলনত। Su-30 ফাইটাৰ জেট, R-37 এয়াৰ টু এয়াৰ মিছাইল ক্ৰয়ৰ সন্দৰ্ভত হ’ব আলোচনা।

S-400 এয়াৰ ডিফেঞ্চ ব্যৱস্থাক লৈয়ো গুৰুত্বপূৰ্ণ আলোচনা দুয়োখন দেশৰ মাজত। দুয়ো দেশৰ মাজত স্বাক্ষৰিত হ’ব ১৫খনতকৈ অধিক দ্বিপাক্ষিক চুক্তি।

সন্ধিয়া প্ৰধানমন্ত্ৰী মোদীৰে যুটীয়া সংবাদমেল সম্বোধন কৰিব ৰুছ ৰাষ্ট্ৰপতিগৰাকীয়ে। ৭ বজাত ৰাষ্ট্ৰপতি দ্ৰৌপদী মুৰ্মুৰ নৈশ ভোজত অংশ ল’ব ভ্লাডিমিৰ পুটিনে।